ជប៉ុន៖ ក្រសួងការបរទេស និងសហប្រតិបត្តិការអន្តរជាតិ បានបញ្ជាក់ឱ្យដឹងថា ពលរដ្ឋខ្មែរជាង ១ ៦០០នាក់ រស់នៅខេត្តចំនួន៦ នៃប្រទេសជប៉ុន ដែលរងគ្រោះដោយសារគ្រោះរញ្ជួយដី ខណៈមិនទាន់មានរបាយការណ៍ណាថាមានពលរដ្ឋខ្មែរប៉ុន្មាននាក់ស្លាប់ និងរងរបួសនៅឡើយទេ។

តាមរបាយការណ៍និស្សិតខ្មែរចំនួន៣រូប ដែលស្ថិតក្នុងខេត្ត Ishikawa និងចំនួន ៥រូបផ្សេងទៀត ដែលស្ថិតក្នុងខេត្ត Niigata ត្រូវបានជម្លៀសមក ទីតាំងមានសុវត្ថិភាពរួចហើយ។

ក្រសួងការបរទេស និងស្ថានទូតកម្ពុជាប្រចាំប្រទេសជប៉ុន បាននិងកំពុងតាមដានដោយយកចិត្តទុកដាក់នូវការវិវត្តនៃគ្រោះធម្មជាតិនេះ និងបានខិតខំទាក់ទងពលរដ្ឋខ្មែរមួយចំនួនរស់នៅក្នុងប្រទេសជប៉ុន។ រាជរដ្ឋាភិបាលកម្ពុជាចាត់ទុកសុវត្ថិភាពរបស់ពលរដ្ឋខ្មែរគឺជាអាទិភាពចម្បងបំផុតរបស់រាជរដ្ឋាភិបាល។

ស្ថានទូតកម្ពុជានឹងបន្តតាមដាន និងសហការជាមួយ អាជ្ញាធរជប៉ុនពាក់ព័ន្ធ ដើម្បីរាយការណ៍ជាប្រចាំអំពីស្ថានភាពវិវត្តន៍។

ក្រសួងការបរទេស និងសហប្រតិបត្តិការអន្តរជាតិអំពាវនាវពលរដ្ឋខ្មែរដែលកំពុងរស់នៅក្នុងប្រទេសជប៉ុន បន្តមានការប្រុងប្រយ័ត្នខ្ពស់ ព្រមទាំងគោរពនិងអនុវត្តតាមការណែនាំរបស់អាជ្ញាធរជប៉ុន ដើម្បីសុវត្ថិភាពផ្ទាល់ខ្លួន។

គ្រោះរញ្ជួយដីនៅប្រទេសជប៉ុន បានកើតឡើងចំថ្ងៃចូលឆ្នាំសកលឆ្នាំ២០២៣ ក្នុងកម្រិត ៧.៦ រិចទ័រ ដែលបង្កជារលកយក្សស៊ូណាមិនៅតាមតំបន់ជាប់មាត់សមុទ្រនៃខេត្ត Ishikawa និងបណ្តាខេត្តក្បែរខាងដូចជា Niigata, Toyama, Yamagata, Fukui និង Hyogo ដែលមានកម្ពស់ទឹកឡើងដល់ ៥ម៉ែត្រ៕